il napoli

Sta jurnata remmane int’a memoria,
anzi no: se sistema  dint’o core.
“Napulitane, vuje restate fore”,
ed invece trasettemo int’a storia.

I’ che Napule! Lucido, ordinato,
‘na squadra fatt’e fierro, e non di vetro.
‘Na vota annanze, po’ tre vote addietro,
‘o raddrizzammo sempre, ‘o risultato.

Zalayeta. Lavezzi, Hamsik, Gargano:
hanno signato tutt’e nuove acquiste.
Quanto so’ brave, tutti l’hanno viste,
cu loro – e Blasi! – se po ghì luntano.

Quatto a quatto, gnorsì. Fernesce in gloria:
putev’ ì meglio, sì, ma pure peggio.
Pe comme s’era misa, stu pareggio
pe nuje vale  chiù assaje  de ‘na vittoria.

Ncacaglia: ca le manca la parola
dopp’a partita, a Roma, nu criaturo
for’o stadio, mentre già se fa scuro:
“ ‘A papà, ce sta un asino che vola!”