il napoli

E’ poco ch’è fernuto ‘o campionato:
‘e giocatore mò stanno in vacanza.
E nuje, comme tenessemo ‘a valanza,
pisammo chell’c’anno cumbinato.

In casa, grandi; specialmente ‘e notte.
Miez’all’ate, Inter, Juve ed Udinese
venetteno, e abbassajeno ‘e pretese:
avettano partì cu ll’osse rotte.

In trasferta, na meza delusione:
contro Catania, Milan e Atalanta
mazzate ne pigliajemo tante e tante,
e poche furono ‘e partite bone.

‘A difesa
Positiva ‘a staggione d’e purtiere:
l’anno difesa buono, ‘a nosta rezza.
Iezzo e Gianello, site na certezza,
e stu Navarro tene assai mestiere.

‘A difesa: promossa cu’ riserva.
Nu poco troppo molli, leggerini,
si facimme doje cunte (e nu Contini)
‘e gol n’amme pigliate na caterva.

‘O centrocampo
‘A virtù nunn’a maje tenuto prezzo:
chi ‘a cerca a ccà, chi ‘a va cercanno ‘a llà,
ma se sape (nunn’è na nuvità),
c’a truove a centrocampo: giusto in mezzo.

E fui chesto, ‘o segreto d’o successo.
Gargano e Blasi, insieme c’o slovacco
all’avversarie l’anno fatto ‘o pacco,
l’anno imbrigliate: ccà nisciuno è fesso.

L’attacco
‘E punte, na stagione favolosa,
ma Zalayeta poi s’infortunò.
E nun servette Sellers-Clouzot
per arrestare la pantera Sosa.

A Lavezzi, c’a sera jeva in campo
l’essa dicere grazie, ‘a società,
ca sparagnaje sull’elettricità:
‘a faceva isso stesso, ‘o Pocho: ‘o lampo.

Ma mò dicite: senza esaggerà
(comm’a isso, uno sulo ‘nce ne steva),
ma certi vvote, a vuje nun ve pareva
ncopp’o campo, ‘e verè chill’atu llà?…

Lo staff tecnico
Reja, si’ gruosso! Tu nun l’ea penzà
quann’attaccan’a solita canzone
ca tu nun sì all’altezza, nun sì buone.
E invece fuste ottavo, in serie A!

Cu te ce sta nu tipo fino fino
ca tene ‘a capa a palla di biliardo.
Chiù furbo ‘e sette volpi: un gattopardo,
ca se chiamma Giampaolo Marino.

Mò ce fermammo. Basta ch’e parole,
se ne so dette troppe. ‘O Presidente
mò che overo s’è fatto competente
sape perfettamente quel che vuole.

Vò nu Napoli tuosto, ca nun fuje
quanno se trova int’e difficoltà.
Aurelio, nunn’abbastà a ringrazià:
è proprio chello ca vulimme nuje!