il napoli

Austo, pe’ furtuna sì passato!
Ce facettemo ‘o greco e l’albanese,
ma era gente accussì, senza pretese:
chello ca c’interessa è ‘o campionato!

Pare ca simme forte chiù d’aiere,
si vulimme stà a chello c’amme viste:
so veramente buone, ‘e nuove acquiste,
quatto: comme so quatto ‘e moschettiere.

Denis sarrà na spina dint’e cianche:
già s’è visto ca tene grossi mezzi.
Cu chell’ato fenomeno, Lavezzi,
all’avversarie ‘e fann’abballà ‘o tanque.

Rinaudo c’o pigliajemo d’o Palermo,
addò l’ottantatrè c’è pure nato:
un’e novanta, gruosso, ben piazzato,
d’a difesa sarrà nu punto fermo.

Nu bellu colpo è stato Christian Maggio:
nu treno, quanno fuje ncopp’a fascia.
Mozzeca l’avversario, e nunn’o lascia,
e tene forza, tecnica e curaggio.

Al finale è arrivato Andrea Russotto
d’a Svizzera (stev’int’o Bellinzona):
è na scommessa, perch’è nu guaglione
(‘o ddice ‘a data ‘e nascita: ottantotto).

Arrassusia succere quacche guaio,
‘e premesse so’ bone. Via, si parte!
Tranquille: ‘o vvide, stamme in man’all’arte:
o forse so’ premesse ‘e marinaio??